Los Celtas costituyen el primer grupu humanu importante que puebla el territoriu del autual País Llïonés. S' estendienun dende' l centru d' Europa p' hacia l' uesti, ocupandu gran parte del continente. Estas invasiones entaman hacia' l añu 700 e.C. y debienun de finar p' hacia' l 500 e.C., aprosimadamente.
El pueblu celta yera eminentemente belicosu y amante la natura (solían aconceyase nas prosimidaes de biescas y cursos d' augua pa cellebrar los sous ritos), indómitu ya individualista, amante de lleyendas ya hestorias imaxinativas; grandes gerreros (homes y muxeres pur igual) que prestaban d' esaxerar las suas fazañas bélicas y, en ciertu móu catastrofista, cun un acusáu avenceyamientu p' hacia lu matriarcal y mui lligaos a los sous vínculos de sangre, amistá y honor. Nel País Llïonés, los invasores celtas amestanunse cunos habitantes llariegos anteriores a eillos, quienes aceutanun y s' integranun na sua cultura ya el sou xeitu de vida mui rápidamente. Esta raigame céltica tovía se caltién en muitos aspeutos de la mentalidá popular autual.
(Pallozas típicas astures de la provincia de Llión)
Dientru la sua organización social cabe destacar a los "keltes" ou xefes militares y a los "druidas" ou xefes relixosos, quienes en los sous habituales viaxes intercambiaban ente sí tóu tipu de conocencias. Se dedicaban cimeiramente a la caza, la pesca, la agricultura, la ganadería (esencialmente caballar) y l' artesanía; nun faciendu distinción de profesiones pur raizón de sexu. Vivían en poblaos nominaos castros, de xeitu circular, en los suos llímites amontonaban cantos rodaos cumu defensa. Ca familia habitaba una casa (palloza) que disponía d' un piqueñu campu pa los sous llabores agrícolas y ganadeiros. En ca castru esistían artesanos mui importantes pa la sua economía tales cumu carpinteiros, fierreiros, alfareiros y teixedores. Los celtas creyían na resurreición y, quiziabes, tamién, na reencarnación, y los sous dioses vivían nas biescas, montes ou auguas.
Las tribus celtas que s' asentanun nel territoriu del autual País Llïonés fonun las d' arréu:
A) Los cántabros
S' establecienun na parte noruriental l' autual provincia de Llión. Yera una tribu seminómada, dedicada sobrutóu a la cría de caballos asturcones; mui avenceyada a los astures, cun quienes seyes confundía habitualmente. La sua capital yera Vadinia (l' autual Riañu).
B) Los astures
Poblanun los márxenes del Astura (autual Esla) y el Sil ata' l Cea y Zamora pul Esti, el Sabor pul Uesti y el Dueru pul Sur. Los astures s' estendienun, postreramente (sobru' l sieglu II d.C.) p' hacia' l norte, ocupandu lu que guei ye Asturias. Yeran seminómadas y cimeiramente ganadeiros. La capital los astures fou l' autual Astorga.
Tribus astures yeran los "zolae" n' Aliste, los "langiati" en Tábara, los "superati" en Vidriales, los "brigecini" en Polvorosa, los "beduniensi" nel Páramu, los "amaci" na Maragatería, los "orniaci" na Montaña y los "pesici" en Babia y Llaciana.
C) Los galaicos
Poblanun la parte más ucidental de l' autual provincia de Llión, adientrándose na totalidá del autual territoriu gallegu, ente' l Dueru al Sur y el Sabor al Esti. Yeran ganadeiros y cazadores y, en menor medida agricultores.
D) Los vettones
Poblanun las dos vertientes del sistema vetónicu. Los romanos confundienunyes nun entamu cunos lusitanos, que se situaban hacia' l Uesti y cun quienes permanecían cumu alliaos.
(Castru vettón en Llumbrales, Salamanca)
Yeran seminómadas y ganadeiros. La sua capital fou Helmántica (Salamanca), onde residióu el princeps, ou xefe la tribu, inda dispués de cayer nas manos de Roma. Los dominios vettones diban dende' l Dueru ata' l Taxu, y dende' l llímite aproximáu autual cun Castiella ata' l del autual Pertual.
Son famosos los sous monumentos chamaos "verracos", en Toru, Salamanca, Villalcampu, Ciarrodrigu, Gallegos d' Argañán, etc.
E) Los vacceos
Posiblemente los menos influyenciaos pula cultura celta. S' asentaban dende' l Dueru y Toru hacia la Tierra de Campos, ocupandu la parte Noresti de l' autual provincia de Zamora. La sua capital yera Palantia (Palencia) y mayoritariamente cerealistas.
