Las invasiones de los bárbaros
Las primeiras invasiones de los pueblos bárbaros tienen llugar a partir los entamos del sieglu V. Éstos pueblos son:
A) Los suevos, d' orixe centrueuropéu, posiblemente de l' autual Polonia. De la sua manu parez reforzase l' individualismu y la falta de rimpuesta ante problemas nacionales. Tamién parez d' orixe suevu l' apegu a la tierra y a l' afición pulos llugares húmedos y verdes. L' autual País Llïonés fou una zona vital pa esti pueblu y el sou asentamientu eiquí duróu dalgu más de sieglu y mediu.
B) Los alanos, d' orixe asiáticu. Mui poucos d' eillos permanecerían nel nuesu territoriu, s' asentanun na parte meridional la península.
C) Los vándalos asdingos, d' orixe centrueuropéu, posiblemente del sur de l' autual Polonia. Obligaos pulos godos, abandonan el sou asentamientu habitual y recorren la mayor parte de l' Europa ocidental ata asentase al sur de la península hispánica. Postreiramente invaden la práutica totalidá del autual territoriu llïonés faciendu retroceder tantu a suevos cumu a visigodos. Finalmente fonun refugaos, inda de la propia península y obligaos a asentase nel norte d' África, fundandu el Reinu africanu los Vándalos.
D) Los godos ou visigodos, d' orixe escandinavu. Organizanun cultivos nas quintas romanas y lleganunos el sou códigu de lleis, el “Códigu d' Euricu”, que sedrá base ou llibru llegal del reinu llïonés medieval. A eillos debemos tamién el primer monumentu d' una granible categoría artística calteníu nel nuesu territoriu, “San Pedru la Nave”, en Zamora.
(San Pedru la Nave, Zamora. Arte visigóticu del s. V)
L' ocupación musulmana
Los vitizianos allinunse cunos musulmanes, albidrandu qu' éstos, vencíu el sou oponente don Rodrigu, tornaríanyes la corona. Peru nun fou d' esti xeitu, pues los recién chegaos repartense' l territoriu. Al norte del Duero se sitúan los bereberes, procedentes del norte d' África. Al sur, los árabes, exipcios y sirios, al sou mandu Muza qu' entra en Salamanca en 712. La resistencia fou práuticamente nula al sere la mayoría vitizianos, nun habiendu matanzas nin estruciones. Tan sólu Benavente y Valderas son tomadas al asaltu. Sólu dalgunos godos y los astures organizanun la sua resistencia nas montañas cantábricas. Las secuelas de la gerra civil goda durarán inda muitos años. L' oficialidá, pur embargu, sedrá musulmana y lu sigirá siendu durante dalgún tiempu más.
