Camentariu del Fueru d' Alba de Tormes
L' orixe d' esta pernomada villa ye tan escuru y llonxanu que la tradicion y la hestoria lluchan cun invenciones y fábulas pa desllindalu y aclaralu, anque ensin frutu ata guei. Qu' esistióu inda enantes de sere sometida Hispania al duru poder romanu, ye daqué bien nidiu; asina cumu tamien ye patente que durante las primeiras invasiones de los bárbaros septentrionales, y en cuantu permanecióu na península el cetru de los godos yera la sua suerte semeyante a la de Salamanca y demás pueblos circunvecinos. La irrucion los árabes sometióula al sou dominiu, nun tan bárbaru cumu la imaxinacion lu pinta, nin tan horrible cumu lo cuentan multitú d' hestoriadores a quienes la pasion nacional y l' odiu de relixón prïocupaban cun escesu, si bien disculpable n' outras edaes que nun son la nuesa, que blasona d' imparcial y d' illustrada, cun más ou menos raizón.
Dalgunos datos, xenerales y someros, cumu ye llóxicu, nos mueven a creyer que la villa d' Alba sufrióu idénticas alteraciones de restauraciones y abandonos durante los cuatru primeiros sieglos de la reconquista. Quien fuese, d' un xeitu indubitable, el sou postreiru repoblador, nin costa, nin ye fácil fallare' l derroteru pur onde atopanos esa curiosa nueva. Hai quien dici que lu fou Ramon de Borgoña, al propiu tiempu que de Salamanca; peru esta indicacion s' afita únicamente n' analoxías y conxeturas que, nesti casu, nun carecen de verosimilitú.
Seya d' estu lu que quixera, lu que apaez nidiu pur prebas hestóricas qu' hemos verificáu cun motivu de la presente espublicacion, ye que enantes de mediar el sieglu XII tenia yá Alba una importancia grandísima y d' un valor tal qu' hubu de concedela Fueru propiu el céllebre conquistador d' Almería y de Baeza; Fueru ata gui sepultáu nas sombras del olvíu, y del cual daremos agora una breve nueva, puestu que asperamos mui prontu dalu a la lluz íntegramente. Esiste d' él nel archivu la villa, nun l' orixinal, nin el primitivu, sinón una copia autorizada en castellán y cuya traducion paeznos d' entamos del sieglu XIII pul sou llenguax ya estilu. Escomencipia del xeitu darréu:
EGO ADEFONSUS HISPANIARUM IMPERATOR ET UXOR MEA BERENGARIA DAMUS ET CONCEMMUS ISTOS FOROS AD CONCILIUM DE ALBA DE TORMES; y fina asina: Facta carta Salamantiew IIII nonas iulii era MCLXXVIII (año de 1140).
L' espíritu del Fueru ye abondu lliberal y nidiamente favorable a las esenciones y franquicias de la poblacion . Prohíbese' l dreichu d' asilu, de que tantu s' abusaba n' aqueillos calamitosos tiempos; castigase cun rigor al que edificase fuerte ou torre salvu en castiellu ou igresia; desixe xuramentu de guardar los fueros de la villa a tol que la tenga pul rei, enantes de tomar posesion del sou cargu de merinu, alcaide, conde ou siñor; al que se castigaba cun pena aflitiva; nun seye imponía la confiscación, llei vraeiramente almirable y rara; nun se daba mandamientu de prisión, sinón cun ciertas condiciones; nun habia igualdá nas penas, cumu yera costume, pa los xudíos y cristianos, peru había tolerancia relixosa; almitía las composiciones pecuniarias pur feridas y ata pur muertes; los vienres, cumu en tantos outros fueros, s' alministraba xusticia, y los domingos aconceyabase' l Cabildu ou Conceyu pa tratar de las temas comunales. Alba, na fin, yera un pueblu de realengu mui favorecíu y mui prestosu ata el puntu d' haber contáu na edá media más de 30.000 almas, el doble de las que guei tien Salamanca.
